— 228 —
dengen kendi berisi ajer, dan sesoedahnja membri inget, soepaja Dantes lebih berhati-hati, lantas sadja ija berangkat pergi.
Dengen girang Dantes denger pintoenja kamar dikoentji, dan setelah boenji kakinja cipier ijang djalan, soedah tida terdénger lagi, lantas sadja Dantes kisarken kombali pembaringannja. Di sitoelah baroe ija mendapet taoe, bahoewa tadi malem ija poenja petjahan kendi soedah bertemoe pada batoe, sedeng ija maoe goegoerken sadja pasir dan kapoernja tembok. Sebab tembok itoe ada basah, maka gampanglah djoega pasir-kapoernja dapet digoegoerknn sedikit-sedikit.
Dantes bekerdja dengen radjin, dan sesoedahnja tiga hari berlaloe, soedah dapet goegoerken pasir dan kapoer ijang ada pada sapoetar soewatoe batoe; tapi batoe ini belon dapet dilolosken, kerna masih terpegang oleh pasir-kapoer di sebelah dalem, Dantes tjoba gojangken batoe itoe dengen kakoewatan oedjoeng djati, tapi batoe itoe tida begerak, sedeng petjahan kendi tida boleh dipake aken menjongkel, kerna pada waktoe dipergoenaken begitoe, ija lantas patah. Apatah akal sekarang? Dantes djadi merasa djengkel sekali. Aken tetapi sigra djoega ija dapet satoe ingatan hingga lantas ija tersenjoem.
Kaloe cipier membawa soep, ija bawa itoe di dalem satoe koewali besi ijang bergagang, dan kaloe soedah toewangken soep itoe ka dalem piringnja Dantes, ija bawa pergi kombali koewali itoe. Piringnja Dantes, tida taoe dibawa pergi, dan kaloe habis dipake, ija ditjoetji oleh Dantes sendiri; demikianlah djoega sendok kajoe ijang misti dipake aken mengiroep soep itoe.
