— 230 —
masoekken itoe batoe ijang telah terlepas tadi, ka dalem itoe lobang tembok; kemoedian ija koempoelken sekalian pasir-kapoer ijang goegoer, dan oempetken itoe.
Sebentar lagi si cipier dateng membawa sapotong roti dan taro itoe di atas medja.
„Apa kaoe tida bawa satoe piring boewat gantinja ijang telah petjah?" kata Dantes pada orang itoe.
„Tida," sahoet itoe cipir: „kaoe ini toekang petjahin barang: kaoe moelai dengen metjahin kendi, dan sekarang kaoelah djoega poenja sala, maka akoe mengindjek piringmoe; kaloe semoea orang toetoepan, meroegiken seperti kaoe tentoelah Gouvernement tida nanti bisa membajar karoegian itoe. Akoe maoe tinggalken sadja koewali ini di sini, biar dipake olehmoe seperti gantinja piring; dengen begitoe, brangkali kaoe tida nanti meroesakken lagi perabot."
Dantes sanget merasa girang, hingga ija bersoekoer pada Allah dengen segenap hati. Sedari djadi manoesia, ija belon taoe merasa girang sampe begitoe.
Aken tetapi sedari ija sendiri moelai mengorek-ngorek tembok, itoe soewara ijang terdenger doeloehan tida terdenger poelah: Dantes poen tida denger lagi boenjinja tembok digasir dari kamar tetangga. Tapi hal itoe tida djadi lantaran aken Dantes tida teroesken kerdjaän sendiri: kaloe itoe tetangga tida dateng padanja, ija sendiri nanti dateng pada itoe tetangga. Maka dengen radjin Dantes itoe teroesken kerdjaännja sampe di waktoe sore.
Pada waktoe cipier ampir dateng, Dantes beresken segala barang di kamarnja soepaja cipier tida nanti dapet doegaän apa-apa.
Sahabisnja makan di waktoe sore, Dantes bekerdja kom-
