— 236 —
― „Soekoer! biarlah kaoe menoenggoe sampe besok."
Dantes merasa senang, dan lantas berlaloe dari depan itoe lobang di tanah. Sesoedahnja ija oempatken goegoerannja tembok, ija kisarken kombali bale pembaringannja, hingga berapat pada tembok di betoelan itoe lobang gasiran.
Moelai dari itoe waktoe Dantes ada merasa senang sekali: ijang ija tida nanti tinggal sendirian lagi, malah brangkali djoega terlepas dari pendjara; sekalipoen tida bisa terlepas, ija ada ampoenja temen boewat mengomong-omong. Tertoetoep dengen ada ampoenjå temen, boleh dibilang sadja setengah tertoetoep.
Di dalem itoe antero hari Dantes djalan-djalan bolak-balik di dalem kamarnja, sedang hatinja tida brenti berdebar-debar. Sebentar-bentar ija merasa koewatir, kaloe-kaloe kasenangannja nanti terganggoe; djika merasa begitoe, ija berdoedoek di pembaringan dan teken hatinja sendiri ijang bergontjang-gontjang. Djika denger soewara apa-apa sedikit sadja, ija melompat hamperi pintoe. Sering-sering ija merasa djoega koewatir, kaloe-kaloe ija nanti dipindahken ka kamar lain, hingga djadi terpisah dari itoe sobat ijang belon kelihatan roepanja, tapi toch telah tertjinta.
Pada ini perkara, Dantes ada berïnget tetep sekali. Kaloe sampe cipier brani kiserken pembaringannja, aken tjari taoe kaädaännja lobang di tembok, ijang terpedeng dengen itoe, ija nanti hantem kepalanja cipier dengen satoe batoe besar, di mana kendi ajer ada tertaro. Djika djadi begitoe, ija nanti dapet hoekoeman mati; aken tetapi apa ija belon djadi setengah mati atawa ampir mati, oleh kerna merasa kesel dan poetoes pengharepan ?
Di itoe waktoe sore cipier dateng seperti biasa; Dantes
