— 237 —
boeroe bale pembaringannja: dengen berdoedoek di sitoe ija poen boleh mendjaga lebih baik pada itoe lobang ijang terpedeng dengen pembaringannja itoe.
Selaloe Dantes ada melihat dengen mata bersorot tadjem pada cipier itoe: hingga cipier itoe berkata padanja.
„Ada apa? Matamoe beringas kombali; apa kaoe moelai djadi gila lagi?"
Dantes tida menjahoet; kerna ija ada selempang, kaloe-kaloe soewaranja ijang goemeter nanti terbitken doegaän apa-apa di hatinja cipier. Orang ini memandang padanja sekoetika lamanja, laloe berdjalan pergi sambil gojang kepala.
Tempo hari soedah djadi gelap, Dantes ada kira, bahoewa ija poenja tetangga nanti dateng beromong lagi sama dia; aken tetapi sampe pada besok pagi, tetangga itoe tida terdenger gerak-gerakannja. Tapi setelah soedah djadi siang dan cipier soedah dateng bawa makanan, Dantes dapet denger boenji tembok ijang terpoekoel tiga kali di kolong bale pembaringannja. Ija kiserken bale itoe, lantas berloetoet di depan lobang gasirannja.
„Kaoe ada deket padakoe?" kata Dantes itoe pada tetangganja: „akoe ada di sini."
„Apa cipier telah dateng padamoe?" tanja si tetangga.
― „Soedah; dan di waktoe sore baroelah ija nanti dateng kombali; maka kita ada poenja tempo doewa belas djam.
― „Kaloe begitoe, akoe boleh moelai kerdja?"
― „Ja, boleh sekali! di ini waktoe djoega biarlah kaoe moelai."
Di itoe waktoe djoega sebagian dari tanah, di mana Dantes ada berloetoet, ambles dengen sekoenjoeng-koenjoeng, hingga dengen sigra Dantes itoe kiserken dirinja ka belakang,
