— 496 —
berbangkit, dan djoeragan praoe djalan mengampari, dan berkata padanja:
Toewan Simbad ada pesan kita-orang, soepaja kita sampeken ija poenja tabe pada toewankoe; ija soeroeh djoega kita-orang mengabarken, bahoewa ija ada merasa doeka, oleh kerna tida bisa bertemoe doeloe padamoe aken bri slamat tinggal; tapi ija, mengharep, ijang toewankoe nanti membri maäf padanja atas perkara itoe, kerna ija soedah misti berangkat ka Malaga dengen koenjoeng-koenjoeng."
,,Ha! Gaëtano!" kata Franz itoe: ,,kaloe bagitoe, apa ijang akoe telah dapetken di sini, ada perkara ijang sebenarnja? Betoel-betoel ada seorang ijang telah trima akoe di poelo ini, sebegimana radja-radja menerima tetamoenja".
,,Sekarang kenjataan bahoewa orang berkata kata itoe telah ada dengen sesoenggoehnja," sahoet Gaëtano:,,toewan boleh lihat itoe di sana ija poenja kapal ijang berlajar pergi; kaloe toewankoe melihat dengen teropong, brangkali djeega toewan mendapet lihat itoe toewan Simbad di antara orang-orang ijang ada di atas dek."
Sambil bilang begitoe Gaëtano itoe menoendjoek ka soewatoe tempat di moeka laoet, Franz mengeloewarken ija poenja teropong dan pake itoe aken melihat ka itoe tempat ijang di oendjoek.
Tida salah katanja Gaëtano. Franz dapet lihat Simbad ada berdiri di atas dek dengen memegang tropong dan mengintjar ka darat. Ija ada berpakean sebegimana waktoe kemaren sore, dan ija kibar-kibarken selampe aken membri slamat tinggal pada Franz ijang kelihatan olehnja lagi mengintjar dengen teropong djoega. Franz samboeti pembrian slamat itoe dengen kibarken djoega selampe. Di itoe waktoe
