— 511 —
,,Pada soewatoe hari Luigi bri taoę pada toewannja poenja mandoor besar, bahoewa ija ada lihat satoe andjing hoetan ijang mendatengi dari goenoeng Sebijn, hingga ija koewatir, kaloe-kaloe binatang itoe nanti satroni domba. Mandoor besar membriken padanja satoe senapan, dan memang itoe- lah ijang diharep oleh Luigi.
,,Dari itoe tempo Luigi itoe moelai beladjar menembak, hingga boekan sadja segala heiwan alas dan boeroeng ijang kalihatan, hanja poehoen-poehoen poen ditembaki olehnja. Sigra djoega anak itoe soedah djadi bisa menembak dengen djitoe sekali.
,,Di koeliling tempat orang tjerita, bahoewa Luigi Vampa soewatoe anak lelaki ijang paling gagah-berani dan paling koewat di antara anak-anak di paloewaran Rome, hingga maskipoen Teresa ada berparas paling eilok di antara anak-anak prampoewan di seäntero pagoenoengan Sebijn, tida ada satoe lelaki brani njataken tjinta hatinja pada nona itoe, kerna semoewa taoe bahoewa Teresa itoe katjintaännja Luigi.
„Sedeng begitoe, Luigi dan Teresa itoe belon njataken katjintaännja satoe pada lain; aken tatapi kaloe ija-orang tida bertemoe satoe sama lain, doewa-doewapoen tida senang: ija-orang merasa enakan mati dari pada tida bertemoe satoe sama lain saharian sadja. Demikianlah hal marika itoe, sampe Teresa soedah beroemoer anembelas dan Luigi beroemoer toedjoehbelas tahon.
,,Pada masa itoe ada banjak orang bitjaraken dari hal satoe kawanan begal ijang bertempat di pagoenoengan Lipini.
,,Satoe kawanan begal soedah moesti ada kapalanja, tapi kaloe ada seorang ijang maoe djadi kapala, belon pernah tida ada orang ijang maoe djadi rahajatnja; kerna di
