— 512 —
peloewaran ini kota Rome ada banjak orang djahat.
,,Satoe kapala begal ijang bernama Cucumetto, ijang pada masa itoe telah teroesir dari dalem karadjaän Napels, ada melindoeng di soewatoe tempat pada tepi kali Amasina dan tjoba mengoempoelken rahajat.
,,Banjak lelaki moeda, orang-orang Palestrima, Frascati dan Pampianara, mengilang dari tempatnja. Pada moela kali orang doega marika itoe dapet binasa, tapi sigra djoega orang mendapet kabar, bahoewa marika itoe bergaoel ka dalem kawanan begal ijang dikapalai oleh Cucumetto itoe, ijang telah terkenal namanja oleh segala orang. Banjak ijang tjerita, bahoewa dia itoe ada teramat gagah-berani dan berhati kedjam.
,,Pada soewatoe sore ija tangkep dan bawa lari satoe anak prampoewan nama Rita, anaknja seorang Frosinone. Menoeroet peratoerannja Cucumetto poenja kawanan begal, satoe anak prampoewan tjoerian dipoenjai doeloe oleh orang ijang tjoeri; kemoedian ija dipake bersoeka-soeka oleh sekalian begal ijang lain, dengen menoeroet giliran ijang ditentoekan dengen loterij; begitoelah halnja teroes meneroes sehari-hari, sampe semoewa begal soedah merasa bosen dan tinggalken itoe prampoewan, atawa sampe prampoewan itoe djadi mati.
,,Kaloe orang-toewanja prampoewan itoe ada kaja dan bisa teboes anaknja, maka kapala begal kirim soeroehan padanja aken bitjara dari besarnja oewang peneboes; didalem hal begini, lehernja itoe prampoewan tjoerian adalah djadi tanggoengan, ijang itoe soeroehan kapala begal tida nanti ditjilakaï. Djika orang ijang djadi bapa, tida maoe meneboes, maka lantaslah prampoewan tjoerian itoe moelai
