— 527 —
satoe kantong pandjang ijang berisi penoeh dengen oewang emas, dan kasihken itoe pada Luigi dan Teresa. Tapi Luigi gojang kapala dengen berlakoe tinggi, sedeng Teresa ada kalihatan seperti ingin pada isinja kantong itoe. Sebab begitoe, itoe Cucumetto ijang tjeli seperti satoe setan, ada merasa bahoewa Teresa itoe satoe nona ijang soeka sama barang doenia, dan sedeng merasa begitoe, Cucemetto itoe merasa djoega birahi pada Teresa itoe, laloe ija djalan pergi; sambil menengok bebrapa kali aken membri tabepada penoeloengnja, tapi sebenarnja aken meli-hat pada si nona itoe".
,,Di itoe tempo soedah dekat pada hari-raja poewasa dan seperti biasa ini di mana-mana segala orang bersoeka-soeka, tapi dengen tida makan barang-barang ijang atsal ada menapas.
,,Graaf de San Felice membri taoe, ijang ija nanti bikin pesta besar, di mana tetamoe-tetamoe boleh pake kedok dan roepa-roepa pakean. Semoewa orang bangsawan di kota Rome dioendang oleh Graaf itoe. Teresa tida teroendang, tapi ingin toeroet dateng di itoe pesta.
,,Luigi memoehoen idzin, sama hamba-hamba astana soepaja ija boleh toeroet dateng dengen bertjampoer di medan pesta bersama-sama Teresa. Permoehoenannja itoe dikaboelken.
,,Itoe Graaf de San Felice ada poenja satoe anak prampoewan bernama Carmela ijang ada seoemoer dengen Teresa, sedeng Teresa ini tida kalah eilok dengen poetri itoe.
,,Pada waktoe sore di pesta, Teresa hiasi dirinja dengen ija poenja pakean ijang paling bagoes. Ija meniroe prampoewan Frascati, sedeng Luigi ada berpake tjara orang tani.
