— 538 —
pinggangnja, sedeng satoe golok bagoes ada tergantoeng pada ikatan itoe".
Teresa djadi. teramat girang, kerna dengen berpakean begitoe, Luigi ada kelihatan tjakap sekali. Luigi mengarti apa ijang ada di dalem hati toendangannja, laloe dengen tersenjoem ija berkata pada nona itoe:
,,Sekarang kaoe ada sedia aken mengikoeti akoe, kendatipoen begimana djoega adanja peroentoengankoe, boekan ?"
„Ja, akoe sedia aken ikoeti kaoe dengen segenap hati," sahoet si nona.
,,Mengikoeti padakoe, ka mana djoega akoe pergi ?"
„Ja, kendatipoen sampe di oedjoeng boemi."
,,Kaloe begitoe biarlah sekarang djoega kita orang berangkat kerna kita tida sekali boleh berlambat-lambat diam di sini,"
,,Dengen tida menanjaken, ka mana Luigi hendak pergi, Teresa kasihken tangannja sendiri, soepaja ditoentoen oleh itoe lelaki ketjintaännja. Ia-orang berdoewa lantas djalan menoedjoe ka dalem hoetan. Traoesah diseboet lagi ijang Luigi ada kenal sama segala djalanan di dalem hoetan itoe, ija berdjalan dengen taoe betoel ka mana ijang ija menoedjoe, kendatipoen tida ada djalanan ijang tentoe, dan segala djalanan misti dikenali sadja pada adanja poehoen poehoen.
,,Sesoedahnja djalan setengah djam lamanja, ija orang sampe di satoe bagian hoetan ijan lebat, di sitoe ada satoe kali ijang soedah djadi kering, Luigi berdjalan di dasarnja itoe kali ijang terapit dengen tanah tinggi dan ada sedikit gelap kerna tertedeng dengen tjabang-tjabangnja poehoen besar."
