— 541 —
kaoe rasa halnja itoe Luigi Vampa?"
,,Saja rasa," sahoet Albert:,,hal itoe dongeng sadja adanja dan Luigi itoe belon taoe terdenger ada di doenia ini."
,,Apatah artinja dongeng?" kata Pastrini.
,,Ada soesah aken kita terangken itoe padamoe," sahoet Franz:,,Apa sekarang Luigi itoe ada lakoeken kerdjaännja di peloewaran kota ini?"
„Ja, dan dengen kalakoean amat berani, sabagimana ijang belon taoe diperboe wat oleh lain-lain kapala begal."
,,Dan orang-orang politie tida bisa tangkap padanja?"
,,Tjara bagimanatah ija boleh tertangkap? Ija bersobat sama samoewa gombala di dalem rimba, sama samoewa penangkap ikan dan soedagar-gelap di pasisir. Orang tjari ija di pagoenoengan, ija ada di kali: orang soesoel ija di kali, ija pergi ka laoet, dan kaloe orang ada sangkaken dia itoe ada di poelo el-Giglis, el-Guanouti atawa Monte-Christo, sekoenjoeng-koenjoeng ija ada di Albant, di Tovoli atawa di la Riccia.
,,Dan begimana perboewatannja menangkep pada orang-orang di perdjalanan?" ,,Ia tida berboewat banjak perkara hanja menoeroet djaoehnja orang itoe poenja roemah, ija bri tempo 8 djam, 12 djam, satoe hari atawa lebih, aken orang itoe meneboes dirinja; kaloe tempo itoe soedah berlaloe, ija bri lagi tempo satoe djam. Kaloe ini satoe djam telah berlaloe, dan orang tangkapan itoe belon djoega dapet doewit, lantas sadja ditembak atawa ditikam dan habis perkara."
,,Bagimana sekarang, Albert!" kata Franz kapada sobatnja itoe: ,,apa kaoe masih berniat djoega aken pergi ka loewar kota ?"
