— 495 —
XXXIV
SEDAR DARI TIDOERNJA.
Tempo Franz djadi sedar dari tidoernja, ija merasa kaget betoel; kerna apa ijang kalihatan olehnja sekarang, ada beda sekali dengen apa ijang dia lihat semalem, di mana ija telah berdoedoek minoem kopi dan isap pipa bersama-sama toewan roemah soedah tida ada lagi. Ia merasa dirinja ada di kamar goewa laen, ijang ampir tida mendapet terangnja mata-hari; ija merabah ka kanan-kiri, tapi tida dapet merabah lain dari karang atawa tjadas. Dengan merasa heran ija lantas berbangkit, dan laloe mendapet taoe, ijang ija telah tidoer di atas roempoet kering ijang tergelar tebal dan berbaoe haroem. Sesoedahnja menengok ka sana-sini, ija lantas djalan menoedjoe pada tempat ijang kalihatan terang; sigra djoega ija sampe ka moeloet goewa dan dapet lihat langit dan laoet, dan bebrapa matroos ijang lagi berdoedoek di pasisir, sedeng tiada djaoeh dari marika itoe ada praoenja ijang mengambang di ajer.
Dengen marasa enak, kerna menapas di oedara pagi, Franz diam memandang pada moeka laoet, sambil berpikir. Ia ingat, tjara begimana ija telah dateng di itoe poelo, tjara begimana ija telah bertemoe pada Simbad, tjara begimana adanja itoe astana di dalem tanah, dan tjara begimana ija soedah berdoedoek makan-minoem dan makan djoega itoe boeboer hidjo ijang diseboet Hatchis.
Kemoedian ija djalan mengampari pada itoe matroos-matroos, ijang setelah melihat padanja, semoewa lantas
