— 1 —
GRAAF DE MONTE CHRISTO
DIKLOEARKEN OLEH:
Electr. Drukkerij LOA MOEK EN & Co., Batavia.
I
DATANGNJA KAPAL DI MARSEILLE.
Pada tanggal 24 Februari 1815 pengawal di atas martjoe Notre Dame de le Garde membri warta, bahoewa kapal tiang tiga nama „Pharao“, jang belajar dari Smyrna, Triëst dan Napels, ada mendatangi; maka sabagimana biasa kaloe ada kapal sampe, satoe toekang loga atawa pengantar kapal lantas belajar ka loewar palaboehan, dengan meliwat di sapandjang benteng d'If laloe menghamperi pada sampingnja kapal di antara Tandjoeng Morgion dan poelo Rion.
Kemoedian banjak orang lantes berkoempoel di pelatarannja benteng Saint-Jean, sabagimana biasa pada saban kali kaloe-ada kapal datang; kerna hal datangnja kapal di Marseille itoe ada terpandang seperti satoe perkara besar, lebi lagi sebab kapal itoe ada kapal „Pharao“", jang telah didiriken, didandani dan dimoeati di pembikinan kapal dari Phocéon, dan jang ampoenja kapal itoe toean Morrel, pendoedoek di kota Marseille djoega.
Sedang bagitoe, kapal,„Pharao“ itoe datang semingkin dekat, dan dengan slamat ia meliwati di djalanan sempit jang ada di antara poelo Calvareigne dan Jaros. Dengan perlahan kapal itoe berdjalan, sedang padanja ada kalihatan tanda-tanda kadoekaän, hingga sekalian orang jang ada di pelatarannja benteng merasa sedikit kaget dan menanja satoe pada laen, katjilakaän apa djoega telah terdjadi dengan
