— 4 —
„Ija dapet itoe dengen terkoenjoeng-koenjoeng“, sahoet Dantes: „Sehabis berkata-kata sama Commandant pelaboehan, kapitein Le Clére berlaloe dari Napels dengen hati tiada senang; sasoedahnja doewapoeloeh ampat djam berlaloe, ija lantas djadi majit. Kita-orang soedah toeroet atoeran jang biasa aken mengoeboerken di laoet, dengen iketken satoe pelor besar di betoelan kakinja dan satoe poelah di betoelan kepalanja, kita-orang toeroenken djinasatnja kapitein Le Clére ka dasar laoet. Kita-orang nanti anterken ija poenja bintang dan pedang pada ija poenja djanda.“
„Ha!“ kata poela Dantes itoe sambil tersenjoem : „pantes sekali! sasoedahnja ikoet perangin bangsa Inggris sapoeloeh tahon poenja lama, lantes misti mati di tempat tidoer, sabagimana orang ijang banjak.“
„Ja! apatah sekarang maoe dikata, toewan Edmond!“ sahoet si toewan-kapal pada Edmond Dantes: „kita-orang semoewa bagian mati, dan orang jang toewa poen haroes membri tempat pada orang jang moeda; saände tida bagitoe, tentoelah orang ijang moeda tiada aken bisa madjoe; dan dari sebab kaoe telah bri taoe padakoe, bahoea barang-barang moewatan kapal ada dengen slamat.....“
„Ja, saja tetepken itoe, toewan Morrel! semoea barang moewatan ada dengen slamet. Saja rasa, pelajaran ini kali ada mendatengken kaoentoengan lebih dari doeapoeloeh lima riboe frank.“
Habis bilang begitoe, Dantes lantas membri perintah goeloengken lajar-lajar, dan perentahnja itoe dilakoeken dengen sigra, hingga itoe kapal djadi berdjalan dengen perlahan sekali, kerna tida tertoelak lagi oleh angin ijang dari blakang.
