— 5 —
„Kaloe sekarang kaoe hendak naek ka kapal ini soedah boleh dengen gampang, toewan Morrel!“ kata Dantes : „Toewan Danglars, djoeroe dagang, soedah kelpewar dari kamarnja dan boleh kasih segala roepa katerangan ijang kaoe ingin taoe. Saja misti oeroes perkara melaboeh djangkar, dan saja maoe taro tanda perkaboengan di ini kapal.“
Toewan Morrel tida bilang apa-apa, hanja lantes sadja mamegang pada tambang ijang dilemparken oleh Dantes kepadanja, laloe teroes ija naek dengen tjepet sekali di satoe tangga ijang tergantoeng di sampingnja kapal; sedeng begitoe, Dantes pergi melakoeken kerdjaännja sebagi stuurman dan biarken itoe djoeroe-dagang bernama Danglars beromong sama toewan-kapal.
Danglars itoe saorang lelaki moeda ijang baroe beroemoer 25 atawa 26 tahon; moekanja haroes diseboet ada sedikit asem, dan ija biasa merendah banjak pada orang-orang saätasannja, sedeng kalakoeannja pada orang-orang sebawahannja ada kasar sekali; laen dari begitoe, oleh kerna ija ada berpangkat djoeroe-dagang, ijang memang tida disoekai oleh matroos-matroos, ija tida ternama baek di antara orang-orang kapal, sedeng Edmond Dantes ada ditjinta sekali oleh marika itoe.
„Ha, toewan Morrel!“ kata Danglars itoe: „kaoe soedah taoe katjilakaän apa telah terdjadi, ja?“
—„Ja, ja, kasihan sekali itoe kapitein Le Clére. Dia itoe saorang baek dan berhati toeloes.“
—„Laen dari bagitoe, ija djadi djoega saorang pelajaran ijang soedah djadi toewa di tengah laoet dan ada amat pande, sebagimana pantesnja saorang ijang dipertjajaken oleh kantoor dagangnja toean-toean Morrel & Zoon.“
