— 9 —
Zoon. Setelah saja berkata bagitoe, lantes sadja Baginda berkata: „Ha! kami kenal toko itoe. Itoe toean-toean Morrel, bapa dan anak, ada djadi toean-kapal, dan ada saorang bernama Morrel, ijang soeda bekerdja sama kami di dalem satoe barisan bala-tentara tempo kami ada di Valencia.“
„Demi Allah, benar sekali!“ kata itoe toean-kapal dengen girang: „orang itoe Policar Morrel, akoe poenja paman ijang kemoedian mendjadi kapitein. — Dantes, kaoe misti bilang pada pamankoe itoe, bahoea Keizer ada inget padanja, dan kaoe nanti dapet lihat si toea itoe menoempahken aer mata.“
Habis bilang begitoe, toewan Morrel itoe berkata kombali sambil menepok pada poendaknja Dantes: „Ha! baik sekali kaoe soeda toeroet perentahnja kapitein Le Clere dan soedah pergi ka poelo Elba, Dantes! Tapi, hola! saände orang dapet taoe, ijang kaoe soedah serahken satoe boengkoesan pada itoe Maarschalk dan soedah berkata-kata sama Keizer, boleh djadi djoega kaoe mendapet perkara tida enak.“
„Tjara bagimanatah saja boleh mendapet perkara tida enak, toean?“ kata Dantes: „saja poen tida sekali taoe apa isinja itoe boengkoesan ijang saja soedah bawa; djoega apa ijang telah dikataken oleh Baginda Keizer kepadakoe, boekan sekali barang resia atawa perkara ijang tida boleh didenger oleh laen orang. Tetapi, maäflah, itoe doktor dan penggawe-penggawe pabejaän soedah dateng. Saja boleh moendoer sekarang, aken meladeni marika itoe, toeankoe?“
„Ja, sobatkoe!“ sahoet toean Morrel, dan Dantes itoe lantes berlaloe.
Sedeng begitoe, Danglars dateng mengamperi kepada toean Morrel.
