— 14 —
kapal kita ini belon boleh belajar kombali, kaloe tiga boelan belon meliwat; maka kaloe sadja kaoe dateng kombali di dalem tempo tiga boelan, tida ada soesah apa-apa aken „Pharao“. „Tapi kaoe misti inget,“ kata poela toewan Morrel sambil tepok poendaknja Dantes: „ijang „Pharao” ini tida bisa berlajar, kaloe kapiteinnja belon dateng kombali.“
„Kaloe kapiteinnja belon dateng kombali ?“ kata Dantes dengen merasa girang sekali: inget bener-bener, toeankoe! aken apa jang kaoe baroe kataken kepadakoe, kerna kaoe membri padakoe pengharapan ijang terpendem di dalem hati, Apa kaoe ada niatan aken angkat saja djadi kapitein kapal „Pharao“ ini?“
—„Kaloe akoe boleh toeroet sadja kahendakankoe sendiri, Dantes! tentoe sekali akoe soedah lantes kasih tangan padamoe, sambil berkata: „Kaoe soedah diangkat djadi kapitein;“ aken tetapi akoe ada poenja perserohan, sobat! Sedang begitoe, kaoe ini boleh diseboet soedah separo diangkat, kerna dari antara doea soeara boeat mengangkat, kaoe soedah mendapet satoe aken goenamoe. Hareplah djoega pada kaoe, boeat kaoe dapetken soewara ijang satoe lagi: akoe nanti perboeat apa ijang boleh.“
„O, toean Morrel!“ kata Dantes dengen berlinang ajer mata dan sambil pegang tangannja toean-kapal itoe: saja bersoekoer padamoe dengen nama ajahkoe dan Mercedes!“
—„Baik Edmond! — hei! boeat orang ijang baek, memang ada satoe Allah di dalem sorga! berangkatlah sekarang pergi tengok ajahmoe dan Mercedes; kaloe soedah, biarlah kaoe dateng padakoe di roemah.“
„Apa kaoe tida maoe saja anterken kaoe ka darat?“
