— 17 —
II
BAPA DAN ANAK.
Sekarang biarlah kita tinggalken itoe Danglars, ijang, dengen menoeroet napsoe hatinja ijang membentji, soedah omongken perkara ini dan itoe kepada toean Morrel, soepaja ija boleh mendapet sangkaän djelek atas hal Dantes; tapi biarlah kita ikoeti itoe Dantes, ijang sasoedahnja djalan di djalanan La Cannebiére, teroes berdjalan di djalanan Noailles dan masoek ka dalem satoe roemah ketjil, di mana ija lantes mandjat di satoe tangga ijang tinggi sambil memegang dengen sebla tangan pada pegangannja tangga, dan sembari meneken dengen tangan ijang laen serta hati berdebar keras. Achir-Achir ija sampe ka depan soeatoe pintoe ijang tiada ditoetoepken rapet, hingga ija boleh dapet meliat pada antero keadaännja soeatoe kamar ketjil.Kamar inilah ada tempat kediamannja Dantes ampoenja bapa ijang soedah beroeban.
Orang toea ini belon dapat kabar, bahoea kapal„Pharao" soedah dateng, dan sekarang ini ija lagi iketken di djari-djari djendela, batang-batangnja seroepa tetaneman haloes, ijang toemboe dengen merambat pada itoe djari-djari.
Dengen sekoenjoeng-koenjoeng orang toea itoe merasa dipelok orang, sedeng soewara ijang terkenal olehnja, ada kadengeran berkata di belakangnja: „Ajahkoe!"
„Ha! kata orang toea itoe sambil berbalik, dan tempo ija dapet liat anaknja sendiri, ija lantes bergoemeter dan ampir djatoh, tapi tertahan oleh sang anak ijang memelok kepadanja.
