V.
PERDJAMOEAN PENGANTEN.
Pada hari besoknja langit ada terang. sekali. Matahari naik dengen bertjahaja gilang-goemilang, dan sinarnja ijang djernih ada kelihatan berkeredep pada ombak ketjil-ketjil di ajer laoet.
Sedang di hari kemaren kita melihat Caderousse doedoek minoem. di roemah-minoeman ijang djadi sebagian dari roemah-makan la Rèserve, sekarang kita lihat di pertengahan lotengnja ini roemah-makan disediaken aken bikin perdjamoeän. Pertengahan itoe ada besar ada dapet terang dari anam djendela. Di depan djendela-djendela itoe ada satoe galderi atawa loteng-gantoeng ijang pake loneng kajoe.
Hal doedoek berdjamoe soedah ditentoeken nanti djadi pada poekoel doewa belas di waktoe tengah hari; maski begitoe, pada waktoe poekoel sebelas soedah ada banjak orang ijang dateng moendar-mandir di itoe loteng-gantoeng ijang terseboet di atas ini. Marika ini orang-orang kapal Pharao dan bebrapa soldadoe, sobat-sobatnja Dantes.
Semoea orang ini ada pake masing-masing poenja pakean ijang paling bagoes, aken membri hormat pada Dantes.
Di antara marika ini ada tersiar kabar, bahoewa toewan-kapal Pharao, madjikannja Dantes, nanti datang djoega di itoe perdjamoeän; aken tetapi sekalian matroos dan soldadoe itoe rasa, bahoewa hal itoe ada soewatoe kehormatan ijang terlaloe besar boewat Edmond Dantes, hingga tida