— 595 —
pake kareta.
Franz dan Albert menengok satoe pada lain, selakoe ada merasa koerang enak aken pake lagi orang poenja kareta. Si boedjang mendoega apa ijang ada di hati marika itoe, dan lantas sadja berkata poela :
,,Graaf de Monte-Christo telah membri perentah dengen pasti, bahoewa kareta misti disediaken boewat toewankoe berdoewa pakean di dalem antero hari; maka djanganlah toewankoe maloe-maloe aken pake itoe."
Franz lantas meminta, soepaja kandaraän itoe lantas disediaken di depan pintoe pada waktoe itoe djoega. Kemoedian ija dan Albert lantas pergi berpakean-pakean di kamar. Sebentar lagi ija-orang soedah ada di roemah komedi Argentine, berdoedoek di dalem roewangan poenjanja Graaf de Monte-Christo.
Tempo komedi soedah main sebentaran, Gravin G.... dateng ka dalem roewangannja sendiri, dan dan setelah berdoedoek, lantas sadja ija melihat pada roewangannja lelaki poetjet, jaitoe Graaf de Monte-Christo, ijang ija tida dapet lihat pada itoe lelaki, hanja dapet lihat Franz dan Albert di roewangan itoe.
Franz merasa, ijang tentoe sekali Gravin itoe ingin tanja apa-apa padanja, maka lantaslah djoega ija dan Albert berdjalan mengamperi. Baroe sadja ija-orang sampe ka dalem roewangannja Gravin, lantaslah djoega Gravin silaken ija-orang berdoedoek, dan sebelonnja ija-orang sempat berdoedoek betoel, Gravin itoe berkata pada Franz:
,,Lekas amat kaoe soedah berkenalan sama itoe toewan poetjet, hingga sekarang kaoe telah djadi ija poenja sobat baik."
