— 600 —
hari barang makanan haloes, dan makanan ijang sedia oleh Pastrini, tida demikian adanja. Ia-orang kataken dengen teroes terang hal ini pada Graaf de Monte-Christo, dan Graaf ini trima bitjara itoe, sabagimana orang ijang mengarti orang poenja adat sopan.
Albert ada merasa enak sekali oleh kerna lakoenja itoe Graaf ijang amat manis.
Sebab boleh pake teroes Graaf itoe poenja kareta, Albert poen ada merasa amat girang: ija poen ada poenja niatan resia, dan sebab di hari kemaren itoe nona-nona desa ada pake kareta bagoes Albert poen ingin djoega pake kareta ijang boleh saingin karetanja nona-nona itoe.
Pada poekoel satoe setengah. Franz dan Albert toeroen dari loteng dan teroes naik ka kareta; ija-orang poenja koesir dan doewa pengikoet, jang memang ada pake koelit binatang, pake djoega pakeannja ijang biasa, hingga kalihatan seperti binatang ijang berpakean tjara manoesia. Albert ada tantjapken ija poenja saikat kembang lajoe pada lobang kantjing badjoenja.
Setelah lontjeng besar diboenjiken, si koesir poen lantas djalanken kandarannja ka djalanan karajaän, dan sesoedahnja kandaran itoe djalan saliwatan dan dibalikken, saikat kembang haloes terlempar dari dalem satoe kareta ijang berisi orang-orang prampoewan, dan kembang itoe djatoh ka depan Albert di dalem kareta, jaitoelah aken bri tanda, bahoewa kaloe Albert dan sobatnja telah toekar pakean, itoe nona-nona ijang kemaren poen soedah toekar pakeannja, dan ija-orang masi kenali pada Albert oleh kerna adanja itoe kembang di lobang kantjing. Albert tjaboet itoe kembang ijang lajoe dari lobang kantjingnja, dan laloe tantjapken di sitoe itoe kembang
