— 606 —
Di waktoe sore ija-orang dateng di roemah komedi, tapi sebegimana biasa orang-orang di Italië, boekan aken menonton, hanja aken bertemoe dan mengomong-omong sama kenalannja.
Franz dan Albert bertemoe kombali pada Gravin.
Gravin G. . . . maoe bitjara lagi dari hal Graaf de Monte-Christo; tapi Franz lantas bri taoe padanja satoe perkara baroe, ijang Gravin itoe belon taoe: kemoedian lantas sadja Franz itoe tjeritaken halnja Albert sama si nona eilok, ijang belon katahoean siapa adanja.
Dari sebab toeroet katanja orang, perkara begitoe memang sering terdjadi di Italië, Gravin itoe poen pertjaja adanja hal itoe dan lantas djoega membri slamat pada Albert ijang telah dapet ,,djantoeng hati."
Tempo maoe berpisah, Gravin itoe berdjandji pada Franz dan Albert aken bertemoe satoe sama laen di perdjamoeannja Hertog de Braciano.
Itoe nona katjintaännja Albert ada memegang djandji begimana ada terseboet di dalem soeratnja; kerna di dalem doewa hari lamanja ija tida kalihatan.
Achir-achirnja datenglah hari Slasa, jaitoe hari pengabisan dari itoe karajaän bertopeng. Di itoe hari ada rame sekali, kerna segala orang ijang belon toeroet bersoeka-soeka di karajaän itoe, dari sebab tida ada tempo atawa tida ada oewang, toewa dan moeda dateng di itoe karajaän, saling timpoek satoe sama lain sambil bersoerak-soerak dan tertawa, dan kendatipoen begimana riboetnja djoega kalakoean marika itoe semoewa, tida sekali ada terbit keroesoehan, sebegimana ijang sering terdjadi di antara bangsa lain, pada waktoe ada keramean.
