— 623 —
disilaken doewa kali, kerna lantas sadja ija naek dan berdoedoek di sampingnja Beppo, ijang lantas bri taoe padanja ijang ija-orang berdoewa nanti dateng di satoe gedong ijang ada seperdjalanan satoe djam djaoehnja dari kota Rome. Tempo ija-orang soedah ada di tempat soenji di loewar kota, Beppo mengeloewarken doewa pistool dan toedjoeken itce pada dadanja itoe Burggraaf; koesir kareta tahan koedanja dan laloe berbalik ka dalem kareta toedjoeken djoega moeloet pistoolnja pada Burggraaf Albert. Di itoe waktoe djoega datenglah ampat kambrat kita, ijang memang ada mengoempat di tempat itoe, mengamperi pada kareta itoe. Burggraaf Albert hendak melawan, hingga telah menjekek djoega pada Beppo, tapi ija tida bisa melawan pada sekalian moesoehnja ijang bersendjata; ija terpaksa aken menjerah dan toeroen dari kareta, laloe dengen berdjalan di pinggiran kali, orang bawa pada Luigi dan Teresa ijang menoenggoe di lobang goewa di St. Sebastiaän."
,,Ha! saja rasa ada terbit satoe hikajat bagoes!" kata Graaf pada Franz:,,Begimana kaoe poenja rasa?"
,,Saja rasa," sahoet Franz: ,,saja djoega maoe bilang ada hikajat bagoes, seändenja boekan Albert sendiri, hanja lain orang ijang tertangkep oleh Luigi."
— ,,Ja, seändenja kaoe tida dapetken saja di sini, tentoelah djoega ini perkara djelek nanti meroegiken sekali pada sobatmoe; tapi senangkenlah hatimoe: sobatmoe itoe nanti terlepas dengen baik; ija telah merasa kaget, tapi lain dari itoe tida ada karoegian lagi."
— ,,Tapi kita-orang maoe pergi dapetken dia itoe, boekan?"
— ,,Ja, lebih lagi dari sebab ija ada di satoe tempat bagoes sekali. Apa kaoe soedah kenal itoe Goewa Sint-Se-
