— 638 —
— ,,Oh, saorang seperti kaoe ini, tida perloe ada poenja kenalan lebih doeloe, kerna ada gampang sekali aken kaoe berkenalan sama segala orang."
— ,,Kaoe ini baik sekali. Sekarang telah tetap niatkoe aken melantjong ka itoe kota. Tapi apa kaoe maoe berdjandji pada saja, Toewan de Morcerf, ijang djikaloe saja dateng di Parijs, kaoe nanti anter saja djalan keliling melihat kota itoe ?"
— ,,Oh! di dalem hal itoe, Toewan Graaf! saja berdjandji dengen soeka dan dengen sagenep hati, lebih lagi kerna sakarang saja ada dipanggil poelang dengen satoe soerat, di mana ada diseboet djoega hal kawinankoe sama anaknja orang bangsawan ijang ternama baik."
,,Satoe hal kawinan ?" kata Franz dengen tertawa.
,,Ja!" sahoet Albert: "Sebab begitoe, kaloe nanti kaoe dateng di Parijs, kaoe nanti dapetken saja ini telah beristri, brangkali djoega telah djadi bapa orang. Tapi di dalem kaädaän apapoen, Toewan Graaf! saja oelang katakoe, bahoewa saja serta sekalian koelawargakoe ada sedia sadja aken berboewat apa-apa bagi goenamoe."
,,Soekoer sekali!" sahoet itoe Graaf; „kerna, dengen sabenarnja katakoe, kaloe saja belon pergi ka Parijs aken boektiken niatankoe, itoelah tida laen sebabnja, hanja melinken sebab belon ada kenalan koe di sana."
,,Tapi Toewankoe!" kata Albert dengen merasa senang; ,,tidakah sebentar djoega kaoe nanti loepaken itoe niatan aken dateng di Parijs?""
,,Tida!" sahoet itoe Graaf; „niatkoe ada tetap sekali.; saja misti dateng di kota itoe."
— ,,Dan kapantah kaoe nanti dateng di sana ?"
