— 643 —
minta pertoeloengan pada Graaf itoe aken lepasken Albert dari tangan Luigi.
Albert denger bitjaranja Franz dari awal sampe pada achirnja; kemoedian ija berkata:
„Begimanatah kaoe boleh dapetken ijang koerang baik di dalem segala hal itoe? Itoe Graaf soeka, pergi ka sana-sini dengen ija poenja kapal, dari sebab ija orang kaja. Kaloe kaoe pergi ka Portsmouth dan ka Southampton, kaoe nanti lihat di pelaboehan-pelaboehan di sana banjak kapal poenjanja orang-orang Inggris hartawan ijang soeka berlajar aken senangken hati. Soepaja ada poenja satoe tempat perhentian di dalem pelajaran; dan tida terpaksa makan barang makanan djelek dan tida baik, seperti ijang telah dimakan olehkoe di dalem tempo ampat boelan dan dimakan olehmoe di dalem tempo ampat tahon, dan soepaja tida terpaksa tidoer di pembaringan ijang koerang baik, Graaf itoe soedah diriken roemah di poelo Monte-Christo. Tempo roemah soedah sedia, dan ija koewatir kaloe-kaloe Gouverneur Toskana nanti tida kasih ija tinggal di sitoe, ija beli itoe poelo dan lantas pake djoega namanja poelo itoe seperti nama, gelaran. Ada banjak orang ijang pake gelaran dengen namanja tempat ijang boekan kepoenjaännja."
„Baik," sahoet Franz: „tapi apatah artinja itoe pendjahat pendjahat dari Corsika ijang ada di kapalnja ?"
- „Saja rasa kaoe sendiri ada taoe lebih baik dari lain orang, bahoewa pendjahat-pendjahat dari Corsika itoe boekan pentjoeri atawa begal, hanja orang-orang ijang teroesir dari kota atawa dari desanja. Bergaoelan sama marika itoe, toch tida ternama djelek?"
- „Tapi Luigi Vampa dan rahajatnja itoe begal dan pen-
