— 689 —
lihat dengen mata sendiri, tjara begimana itoe Bertuccio telah lakoeken perintah ijang dibriken padanja itoe; maka sebiasanja toewan roemah ija antar Monte-Christo berdjalan sampe di loewar pintoe.
Tida salah doegaännja Monte-Christo, bahoewa perintahnja telah di lakoeken oleh hambanja; kerna baroe sadja ija kaloewar dari pintoe, ija lantas dapetken satoe kareta ijang sedia dan terantar oleh boedjangnja sendiri. Kareta itoe baroe kaloewar dari fabriek ijang termashoer, dan sepasang koeda ijang tarik kandaran itoe, tida ada katjelahnja; di hari kemaren koeda itoe poen telah ditawar orang aken 18000 frank, tapi tida dikasihken oleh ijang poenja.
„Toewan," kata Monte-Christo pada Albert: „saja tida idzinken dirikoe aken oendang kaoe dateng lihat di ini hari ka roemahkoe ijang baroe terbeli dan baroe diperaboti. Brilah tempo saharian padakoe, aken saja silaken kaoe dateng melantjong ka roemahkoe: dengen begitoe saja poen boleh mengharep nanti bisa djoega melakoeken kawadjibankoe sebagi toewan-roemah."
„Kaloe kaoe meminta satoe hari sadja, Toewan Graaf!" sahoet Albert: „senanglah hatikoe ini; kerna boekanlah satoe roemah, hanja satoe astana djoega, ijang kaoe ini ada poenja dewa-dewa atawa sebaginja ijang sadia aken berboewat apa-apa dengen toeroet kahendakanmoe."
„Soekoer sekali, kaloe kaoe maoe pertjaja begitoe," sahoet Monte-Christo sambil menaro kaki di indjakan kareta ijang terlapis dengen beloedroe: „kerna kaloe kaoe tjeritaken kapertjajaän itoe pada nona-nona, nanti terbit perkara baik aken saja ini."
Sambil bilang begitoe dengen bersenjoem, Graaf itoe naik
