— 722 —
menggali, ija ada keloewarken satoe barang dari dalem slimoet dan taro barang itoe di tanah. Saja kapingin taoe, apa ijang diperboewat olehnja itoe, maka saja tinggal menoenggoe dengen berdiam dan tahan-tahan djalannja napas. Kemoedian saja dapet lihat, bahoewa barang bawaännja itoe soewatoe peti ketjil, ijang ada doewa kaki pandjangnja dan anem atawa delapan duim lebarnja. IJa angkat peti itoe, dan laloe masoekken ka dalem lobang dan lantas oeroeki lobang itoe dengen tanah, ijang di indjak-indjak dan dirataken djoega olehnja dengen kaki. Sedeng ija merataken tanah itoe, saja terdjang padanja, dan sambil manikam pada dadanja saja berkata: „Akoe ini Giovanni Bertuccio! Kematianmoe boewat soedarakoe, harta-moe boewat djandanja soedarakoe; kaoe lihat, ijang akoe poenja pembalasan ada djadi lebih sampoerna dari ijang akoe soedah harep." Saja tida taoe, apa ija denger omongan itoe atawa tida; saja rasa ija tida dengar kerna ija roeboeh dengen tida sekali mengaloewarken soewara. Saja rasa panasnja ija poenja darah ijang moentjerat pada tangan dan moekakoe. Di dalem itoe sesaät sadja saja soedah gali dan angkat itoe peti ketjil dari dalem tanah, dan soepaja orang tida nanti sangka ijang peti itoe telah terangkat, saja poen oeroeki kombali itoe lobang; kemoedian saja lantas berlari ka loewar dengen membawa itoe peti dan berdjalan di itoe pintoe ketjil ijang saja lantas koentjiken dari loewar dan bawa djoega koentjinja bersama-sama."
„Bagoes!" kata Monte-Christo: „njatalah ijang kaoe ini telah memboenoeh dan sambil mentjoeri."
„Boekan begitoe, Toewan!" kata Bertuccio.
- „Apa besar djoega djoemblahnja itoe oewang di dalem
