— 791 —
sekali ija datang pada orang dan tida sekali taoe trima sendiri ijang datang melantjong ka roemahnja, biarken sadja istrinja djadi gantinja di dalem hal itoe. Sekalipoen ija sendiri membikin pesta, ija datang ka antara tetamoe sebentaran sadja; di penontonan belon sekali orang dapat lihat padanja.
Setelah ada di depannja Graaf de Monte-Christo ijang terima padanja di soewatoe pertengahan, toewan de Villefort itoe berkata:
,,Toewan! itoe perboewatan baik ijang di hari kamaren kaoe telah bikin aken goena Istri serta anakkoe, ada mewadjibken padakoe aken njataken soekoernja hati padamoe".
,,Toewan!" sahoet Monte-Christo; ,,saja telah merasa amat beroentoeng boleh dapat toeloengi satoe anak aken goena iboenja; kerna toeroet kata orang, katjintaän iboe pada anaknja ada besar sekali serta soetji; itoe rasa enak di hati, ijang saja telah dapat, ada lepasken kaoe dari itoe kawadjiban ijang kaoe seboet dan sekarang telah dilakoeken olehmoe, hingga djadi satoe kehormatan besar padakoe ini, kerna saja ada taoe, bahoewa ini koernia ijang kaoe briken padakoe diwaktoe ini, tida biasa dibriken olehmoe pada sembarang orang; sedang bagitoe, maskipoen ada berharga amat besar, ia tida bertimbang dengan besarnja itoe rasa enak di hati ijang tadi saja seboetken."
De Villefort djadi sangat merasa heran oleh kerna dengar itoe omongan haloes, ijang ija tida sekali doega nanti bisa keloewar dari moeloetnja itoe Graaf; ija poen ada sangka ijang Graaf itoe boekan seorang bangsawan ijang sopan benar. Lebih lagi ija merasa heran, tempo ija soedah doedoek beromong-omong sama itoe Graaf. Dari dalem bitjara
