— 79 —
„Ja, marilah kita pergi,“ sahoet Danglars dengen girang hati.
Kemoedian ija-orang berdoewa lantes berangkat.
Fernand lantas samperi dimana Mercedes sedeng bersender; ija pegang tangannja nona itoe serta memboedjoek aken anterken dia poelang ka desa Catalaan, sobat-sobatnja Edmond anterken ka djalanan de Meillan itoe, sedeng Dantes toewa ampir kelenger dari sebab berdoeka hati.
Dengen sigra di dalem kota telah tersiar kabar, bahoewa Edmond Dantes telah ditangkep dengen ditoedoeh ada djadi orang Bonapartisch.
„Siapatah nanti kira aken ada hal begini, Danglars!“ kata toewan Morrel pada lelaki itoe, ijang telah dateng djoega di kota bersama-sama Caderousse.
„Saja telah bilang, Toewankoe!“ sahoet Danglars: „bahoewa dengen tida ada lantaran satoe apa, Dantes soedah singgahken kapal ka poelo Elba, dan hal singgahan itoe tentoe djoega ada rasianja.“
—„Kaoe toch tida omong-omong doegaänmoe itoe pada saorang, laen dari padakoe?“
—„Tida sekali saja seboet itoe pada lain orang, Toewan! kaoe sendiri poen taoe, ijang dari sebab kaoe poenja paman Policar Morrel, bekas hambanja Napoleon, tida banjak, sedikitpoen orang ada mendoega, ijang kaoe ada menjesal atas hal djatohnja Napoleon, saja takoet betoel menerbitken hal djelek aken Edmond, boleh djoega nanti merembet padamoe.“
—„Sjoekoer, Danglars! kaoe ini anak moeda ijang baik sekali; akoe poen soedah ingat djoega pada kaoe, kaloe Dantes djadi kapitein kapal Pharao.“
—„Ingat djoega aken hal saja?“
