— 110 —
kirimken itoe tjintjin pada orang itoe, ijang misti djadi satoe pertandaän; kemoedian segala pintoe lantas diboekaken aken saja masoek menghadep. Groot-Maarschalk menanja padakoe hal wafatnja kapitein Le Clère, sebagimana kapitein telah bilang padakoe, Groot-Maarschalk itoe nanti kasih padakoe satoe soerat, sambil membri perintah, soepaja saja sendiri moesti bawa soerat itoe ke kota Parijs. Saja lantas berdjandji aken lakoeken perintah itoe; kerna dengen lakoeken itoe, saja poen djadi menoeroet pada kehendaknja kapitein Le Clère. Setelah sampe di pelaboehan Marseille, saja lantas oeroes segala perkara kapal, laloe saja pergi pada toendangankoe, ijang saja dapetken ada dengen slamat dan djadi lebi eilok, dan djoega menjinta padakoe. Dengen toeloengannja toewan Morrel, segala perkara ijang misti dioeroes sama gredja, djadi dapet diseleseken dengen sigra; tegesnja Toewan! saja ada di dalem saja poenja perdjamoeän toendangan; lagi satoe djam sadja, saja aken berangkat menikah, dan saja telah berniat aken berangkat pergi ke Parijs pada hari besok., sedeng begitoe saja ditangkep, oleh kerna adanja itoe soerat toedoehan, ijang kaoe sendiri anggap tida beharga."
„Ja, ja," kata Villefort: „apa ijang kaoe bilang, boleh djadi ada bener begitoe, dan kaloe kaoe ada salah itoelah ada dengen lantaran koerang ati-ati; tapi ini hal koerang ati-ati ada djadi sah oleh kerna adanja perintah dari kaoe poenja kapitein. Serahkenlah pada kami itoe soerat ijang kaoe trima di poelo Elba, dan berdjandjilah demi kehormatanmoe, ijang kaloe sadja kaoe dipanggil, kaoe nanti lantas dateng menghadep; lantas sekarang djoega kaoe boleh balik kombali pada sobat-sobatmoe."
