— 118 —
VIII.
BENTENG d'IF.
Setelah dateng di pertengahan-loewar, itoe Commissaris politie membri tanda pada doewa soldadoe pengawal, ijang lantes dateng mengapit pada Edmond Dantes, sedeng lain soldadoe boekaken pintoe boewat orang djalan menemboes dari itoe pertengahan ka dalem Astana Justitie, laloe sekoetika lamanja Dantes dibawa berdjalan di dalem satoe gang pandjang dan gelap, ijang menerbitken rasa takoet pada orang ijang tida ada ampoenja salah.
Roemahnja Villefort ada berhoeboeng pada Astana Justitie, begitoelah djoega Astana itoe ada berhoeboeng pada roemah boewi, satoe roemah kadoekaän ijang melengket pada itoe Astana.
Sesoedahnja memboelak-belok berdjalan di dalem gang ijang gelap, Edmond Dantes sampe ka depan satoe pintoe jang pake palang-palang besi. Itoe Commissaris politie mengetok dengen paloe besi pada pintoe itoe, dan Dantes ada merasa seperti paloe itoe memoekoel pada hatinja. Sigra djoega pintoe itoe terboeka, dan soldadoe-soldadoe lantes toelak Dantes dengen perlahan, soepaja berdjalan masoek. Sesoedah Dantes ada di dalem, pintoe itoe lantes ditoetoepken kombali.
Di sitoelah Dantes menapas di dalem oedara ijang tida bersih: ija soeda ada di pemboewian.
Orang anterken dia ka dalem satoe kamar ijang bresih djoega, tapi pintoenja pake palang-palang besi dan terkoentji
