— 120 —
— „Betoel begitoe."
— „Baik; akoe sedia aken mengikoet padamoe."
Dari sebab ada pertjaja, bahoewa orang ijang dateng mengambil dia dengen titahnja toewan Villefort, djadi Dantes itoe tida merasa takoet lagi, maka dengen senang ija berdjalan terapit oleh itoe soldadoe-soldadoe.
Setelah sampe di loewar pintoe roemah boewi itoe. Dantes melihat satoe kereta; koesir ada berdoedoek pada tempatnja dan di sebelah itoe ada berdoedoek satoe hamba politie.
„Apa kareta ini boewat mengambil akoe?" kata Dantes.
„IJa!" sahoet satoe soldadoe: „masoeklah!"
Dantes hendak berkata lagi, tapi pintoenja kereta soedah diboekaken, dan ija merasa orang toelak padanja ka dalem kereta itöe. Setelah ija soeda naik lantes disoeroe berdoedoek dengen teräpit oleh doewa soldadoe, sedeng doewa soldadoè ijang lain berdoedoek di bangkoe dihadepannja dan di itoe waktoe djoega kereta itoe lantes berdjalan.
Kereta itoe ada mirip pada pendjara, kerna pintoe-pintoenja ada pake palang-palang besi. Lebih doeloe Dantes tida taoe ka mana kereta itoe menoedjoe: kamoedian ija dapet kenjataän, ijang kareta itoe ada berdjalan di djalanan Caisserie, dan dengen meliwat djalanan St.-Laurent dan Tamaris ija menoedjoe ka tepi laoet.
Sigra djoega kareta itoe berenti di depan satoe roemah, dan dari roemah itoe lantes keloewar doewablas soldadoe pengawal; Dantes melihat sendjata-sendjata marika itoe berkeredep di sinarnja api lentera.
„Apa orang keloewarken ini kekoewasaän balatantara aken dirikoe ini?" kata Dantes di dalem hati.
