— 126 —
„Apa kaoe ada sangka, ijang akoe ini dibawa olehmoe aken dipendjaraken di sana?"
„Memang !" sahoet itoe soldadoe: „tapi biar begimanapoen, sobat! tidalah perloe kaoe pidjit tangankoe ini."
- „Dipendjaraken dengen tida diperiksa lagi ?"
- „Kaoe soedah diperiksa."
- „Kaloe begitoe, akoe nanti dipendjaraken, sedang toewan Villefort telah berdjandji.......?"
- „Akoe tida taoe, kaloe toewan Villefort ada berdjandji apa-apa padamoe; tapi akoe taoe betoel, ijang kita-orang ada berdjalan ka benteng d'lf. He! apatah kaoe bikin? Hajo, kambrat! toeloeng !"
Dantes soedah bergerak dengen tjepat aken berangkat memboewang diri ka dalem ajer; tapi ampat tangan ijang koewat dapet pegang padanja, di waktoe kakinja maoe berlaloe dari praoe. Maka ija tida djadi menjeboer ka dalem laoet, hanja djatoh kombali ka dalem praoe, di mana ija berontak-rontak dengen keras.
„Ha!" kata satoe soldadoe, sambil dengkoelin dadanja Dantes itoe: „pertjajalah omong ijang manis. Sekarang sobat! djanganlah kaoe bergerak; kerna kaloe kaoe bergerak sedikit sadja, akoe tembak kepalamoe. Kaoe soedah tida menoeroet pada perintah ijang pertama, tapi sekarang akoe bilang padamoe, bahoewa perintah ijang kedoewa nanti ditoeroet betoel-betoel olehmoe !"
Sambil bilang begitoe, soldadoe itoe toedjoeken senapannja kepada Dantes, hingga moeloet senapan itoe menempel pada Dantes itoe poenja kepala, sedang kaki dan tangannja ada dipegangi oleh soldadoe-soldadoe ijang lain.
