— 129 —
dibawa ka satoe kamar di dalem tanah, ijang temboknja ada demek, brangkali djoega lantaran kebasahan dengen melesnja mata ajer. Satoe pelita ijang berapi ketjil, ada di atas satoe bangkoe kajoe ijang menerangi di itoe kamar kedoekaän, hingga Dantes djadi dapet melihat djoega pada roepanja itoe orang ijang mengantarken, dia orang itoe berpakean boesoek, moekanja poen djelek sekali.
„Di sinilah tempatmoe aken semalaman ini," kata orang itoe: „sekarang poen soedah malem dan toewan Gouverneur soedah tidoer. Besok, kaloe ija soedah bangoen dan baroe dapet taoe adanja perintah boeat kaoe, brangkali djoega ija nanti membri lain tempat padamoe. Di sinilah ada roti; ajer ada di dalem itoe gendi, dan di itoe podjok ada sedikit roempoet kering aken pembaringanmoe; itoelah sadja barang-barang boeat kaoė. Slamat tinggal!"
Kemoedian, pada sebelon Dantes memboeka moeloet aken menjahoet, dan sebelon ija melihat di mana itoe roti soedah ditaro, dan sebelon ija taoe di mana adanja itoe gendi berisi ajer, dan sebelon ija sempet menengok aken melihat di mana adanja itoe roempoet kering ijang misti djadi tempat tidoernja, itoe cipier soedah angkat itoe pelita dan koentjiken pintoe itoe dari loewar, hingga Dantes djadi diam di dalem gelap dan boleh mengoesoet-ngoesoet pada tembok ijang basah, kaloe ija maoe.
Pada besokannja sinar terang moelai masoek ka dalem itoe kamar, di mana Dantes ada tertoetoep, datenglah itoe cipier ijang kemaren; orang ini telah dapet perintah aken biarken sadja Dantes bertempat di itoe kamar.
Pada waktoe cipier itoe dateng, Dantes masih tinggal berdiri djoega pada tempat kemaren, seperti ija ada terpakoe
