kali abis dia lari bersama Ali ka soewatoe pintoe ijang ketjil, dia masoek lekas dan laloe naik di atas tangga ijang rahasia dan masoek ka kamarnja. Dia tida boeka satoe kaen lelangse atawa kaen djendela, maskipoen toekang djaga pintoe tida taoe ijang graaf soeda poelang, dia teroes kira ijang itoe roemah kosong sama sekali.
Sampe dalem kamar tidoernja, maka Graaf kasi tanda pada Ali aken berdiam sadja, abis Graaf masoek di kabinetnja boewat preksa: semoewa masih sebagimana ada: medja medja toelisnja masih berdiri di sitoe djoega dan koentjinja masih ada di moeloetnja medja toelis. Graaf Poeter itoe kontji doewa kali laloe di tjaboetnja dan di kasi masoek di kantong. Soeda begitoe dia masoek lagi ka kamarnja tadi. Grendel pintoe dia patahin.
Sedeng begitoe, maka Ali bawa sendjata-sendjata ijang di minta oleh Graaf di taronja di atas medja. Ia itoe satoe senapan karabijn, satoe pasang pistol moeloet doewa. Dengen ini sendjata Graaf bole melawan lima orang.
Itoe malem soeda kira-kira setengah sepoeloe. Graaf sama Ali boeroe-boeroe makan roti sama anggoer. Monte Christo boeka pintoe ketjil ijang membikin dia bisa liat di semoewa kamar. Sendjata-sendjatanja semoewa ada deket padanja. Ali jang berdiri di sebelahnja ada pegang satoe kampak peperangan, Graaf bole liat kaloewar kaloe dia liat dari djendela kamarnja.
Soeda liwat djem 2. Di loewar gelap dan soenji sekali, tetapi Monte Christo dan Ali bahna biasa dari doeloe di tempat-tempat ijang sanget berbahaja djadi tadjem sekali pemandangannja, dia orang kendati begitoe gelap, dapet liat di loewar dengen njata djoega apa ijang kedjadian,sam-
