— 1465 —
Toewan" berkata Beauchamp ijang dari tadi diam sadja, ,,toewan kasi salah orang, ijaitoe toewan graaf de Monte Christo, sedang dia tida ada di sini, aken melawan penoedoehan itoe."
,,Akoe tida menoedoeh satoe orang, toewan," berkata Danglars,,,akoe tjoema tjerita sadja apa ijang kedjadian, kendati di moeka-moekanja toewan graaf djoega, akoe brani tjerita ini lagi sekali."
,,Abis apa graaf taoe djoega isi balesan soeratnja toewan?"
,,Ja, dia taoe, sebab akoe kasi liat padanja dan dia batja semoewa."
,,Apa toewan graaf taoe nama ketjilnja akoe poenja papa Fernand, dan nama besarnja Mondego?"
,,Ja, itoe nama memang soeda lama, akoe kasi taoe padanja; maka apa ijang akoe telah bikin ini, tentoe djoega di bikin oleh orang laen, kaloe dia ada dalem akoe poenja tempat. Koetika liwat satoe hari kaoe poenja papa di adjak oleh toewan Monte Christo, aken dateng minta mantoe akoe poenja anak, maka akoe tida trima, akoe tida bilang apa-apa lantarannja kenapa akoe tolak peminangnja, akoe tida maoe bikin riboet. Boewat apa akoe riboet? Apa akoe perdoeli-in toewan Morcerf poenja nama baik atawa tida? Sebab itoe hal tida membikin naik atawa membikin toeroen harga oewang di pasar oewang (beurs)."
Albert merasa moekanja mendjadi merah seperti orang ijang terlaloe maloe. Danglars berkata-kata begitoe melawan penoedoehannja Albert, seperti orang ijang memang sengadja maoe bikin maloe orang laen. Tetapi apa dia tjerita barang ijang sebetoelnja, serta Albert doega apa dia tjari. Dia boekan tjari kasalahannja Danglars atawa Monte
