— 141 —
— „Apa tida lebih baik, kaoe dateng sadja pada Djoeroe Tjap keradjaän, ijang boleh dateng ka hadepan Baginda di dalem segala tempo? dengen toeloengan orang itoe, kaoe boleh menghadep di dalem sembarang waktoe.“
— „Boleh sekali saja minta toeloengannja; tapi tida perloe saja bagiken pada lain orang keoentoengankoe ijang nanti terbit dengen lantaran kabar ijang saja bawa ka Parijs. Toewan taoe? itoe Djoeroe Tjap-keradjaän tentoe sekali nanti toelak saja ka belakang dan trima kepoedjian ijang saja sendiri haroes mendapet. Saja bilang sadja hal ini, Toewan! saja nanti beroentoeng besar, kaloe saja sampeken ini kabar besar pada Baginda Radja, sebelonnja Baginda dikabari oleh lain orang; kerna dengen membawa kabar ini, saja djadi menoeloeng pada Baginda, hingga Baginda tida nanti bisa loepa padakoe.“
— „Kaloe begitoe, pergilah kaoe bersedia aken berangkat; akoe nanti panggil toewan de Salvieux dan minta ija toelis satoe soerat, aken boekaken djalananmoe ka hadepan Sri Baginda.“
— „Soekoer sekali! di dalem tempo seperapat djam saja soedah misti berangkat.“
— „Apa keretamoe nanti dateng di sini?“
— „Ja. Sedeng saja bersedia aken berangkat, saja harep kaoe soeka toeloeng kabarken halkoe pada njonja Markies, demikianlah djoega pada nona René, ijang saja misti tinggalken dengen merasa doeka.“
— „Kaoe nanti dapet bertemoe pada ija-orang, aken membri slamat tinggal padanja.“
— „Soekoer sekali, ingetlah pada itoe soerat.“
