— 143 —
„Itoe lelaki ijang kaoe seboet," sahoet Villefort itoe dengen sigra: „ada pendjahat besar, dan akoe tida bisa berboewat apa-apa aken menoeloeng padanja, Nona!”
Mercedes merasa seperti tertikam di hatinja, dan ajer-matanja lantes mengoetjoer; tapi sigra djoega ija berkata lagi.
„Tapi di manatah sekarang adanja Edmond? saja poen ingin taoe, apa ija hidoep atawa mati.“
„Akoe tida taoe; akoe tida oeroes lagi perkaranja,“ sahoet Villefort ijang dari sebab merasa bingoeng lantaran lihat itoe nona ijang sedih lantes sadja ija toelak nona itoe ka samping dan ija teroes masoek ke dalem roemahnja, ijang lantes djoega ija toetoepken pintoenja, soepaja kadoekaän ijang dateng pada hatinja, boleh djadi ketinggalan djoega di loewar.
Tapi kadoekaän itoe tida dapet dikoentjiïn pintoe. Setelah sampe di dalem kamar, Villefort merasa lelah; ija memboewang napas pandjang, laloe bantingken dirinja ka atas korsi besar dan bersendar sembari meremken matanja. Hatinja ada tergontjang keras, dan roepanja Dantes ada berbajang sadja.
Itoe waktoe hatinja Villefort itoe tida tetap, hanja moendoer-madjoe di dalem niatannja. Sering kali Villefort soedah menoentoet hoekoeman mati pada pesakitan, dan belon sekali ja taoe merasa tergontjang hatinja oleh hal itoe; kerna pesakitan-pesakitan itoe ada bersalah, atawa Villefort rasa marika itoe bersalah. Tapi sekarang ada lain sekali; ija soedah kenaken hoekoeman toetoep seoemoer hidoep pada seorang ijang tida bersalah, sedeng orang itoe lagi merasa amat beroentoeng; boekan sadja ija menjilakaï orang
