— 151 —
Hertog ijang belon taoe soerat itoe!“ sahoet Baginda: „kabarkenlah padanja, apa ijang diperboewat oleh Napoleon di poelo Elba.”
„Toewan!” kata itoe Baron pada Hertog: „segala hambanja Sri Baginda boleh bersoekoer banjak, oleh kerna adanja kabar ijang dateng paling belakang dari poelo Elba Napoleon ada merasa kesel sekali, hingga badannja telah djadi roesak.”
„Dan ija tjakari diri sendiri aken hilangken tempo,” kata Baginda Radja.
„Tjakari diri sendiri?“ kata itoe Hertog: „Apatah ijang dimaksoed oleh toewankoe dengen perkataän itoe?“
„Apa kaoe loepa, Hertog!“ sahoet Baginda: „bahoewa itoe orang besar ada terganggoe dengen penjakit di koelit, hingga senantiasa ija kegatelan?“
„Lain dari begitoe, Toewan Hertog!“ kata itoe mantri politie: „ampir kita boleh pastiken, bahoewa tida berselang lama lagi, Napoleon nanti djadi gila.“
— „Djadi gila!“
— „Ja, ija nanti djadi gila, hingga misti dimasoekken ka roemah gila! Pikirannja telah djadi koesoet; sebentar ija menangis, sebentar ija tertawa; sering-sering ija berdiam di pasisir dan goelingken batoe-batoe ketjil ka dalem ajer; kaloe lima atawa anem soedah tergelinding ka dalem laoet Baginda itoe ada kelihatan berhati senang, seperti ija baroe habis mengalahken moesoeh di Marengo atawa di Auterlitz. Tidakah hal itoe ada djadi pertandaän dari moela-moelanja penjakit gila?”
Blancas djadi berdiam dengen merasa heran, Villefort soedah tida bri taoe segala perkara padanja itoe, tapi soedah
