— 152 —
bitjara banjak djoega, hingga Hertog itoe djadi merasa koewatir.
„Toewan de Blancas belon pertjaja, bahoewa tida ada perkara djelek aken kita-orang,” kata poela Baginda: „sebab itoe, tjeritakenlah padanja, begimana rendah adanja hati Napoleon di ini tempo.“
Sedeng itoe mantri politie memanggoet, Hertog de Blancas berkata sendiri-diri: „Napoleon berhati rendah!“
„Rendah betoel, Toewan Hertog!“ kata Dandré: „Belon berselang lama, baginda itoe memeriksa keadaännja ija poenja balatentara, dan di itoe waktoe ada bebrapa soldadoe kasih taoe padanja, ijang marika ingin poelang ka Frankrijk. Baginda lantes lepasken marika itoe dari kerdjaän balatentara,sambil bri pesenan pada marika, soepaja marika pergi bekerdja di dalem balatentaranja marika poenja radja jang amat baik. Begitoelah baginda itoe sendiri telah berkata. Toewan Hertog!“
„Nah, Blancas!“ kata Baginda: „begimana kiramoe sekarang?“
„Hamba rasa toewankoe!“ sahoet Blancas: „mantri politie atawa hamba sendiri telah dapet kabar salah; tapi dari sebab mantri politie tida gampang boleh keliroe, maka tentoelah djoega hambamoe ini ijang salah. Sedeng begitoe, Toewankoe! baiklah djoega toewan tjoba sendiri bitjara dengen itoe orang ijang telah dateng membawa warta, dan hamba memoehoen dengen sanget, soepaja toewankoe nanti trima orang itoe dateng mengadep.“
„Baik, Hertog!” sahoet Baginda: „atas permintaänmoe kami nanti trima orang itoe dateng padakoe; aken tetapi, biarlah kami bersedia doeloe. — Toewan Baron! apa kaoe
