— 155 —
— „Dan toewankoe pake anaknja seorang begitoe!”
— „Kaoe merasa heran, sebab tida taoe begimana adanja hal, Hertog! Kami soedah bilang, bahoewa Villefort itoe ingin ternama besar; aken mengangkat diri sendiri, dia itoe tida nanti pandang satoe apa, hingga bapanja sendiri ija nanti tjilakaï djoega.”
— „Kaloe begitoe, hamba boleh bawa dia ka sini?”
— „Sekarang djoega bole, Hertog! Di mana ija ada sekarang?”
— „Ija menoenggoe di dalem hamba poenja kareta.”
— „Pergilah panggil dia ka sini!”
Itoe Hertog lantes berangkat pergi dan sigra djoega ija dateng kombali. Tapi sebelon sampe ka hadepan Baginda ija mendapet sedikit sangkoetan: Villefort poenja pakean tida ada sebegimana pakeannja orang ijang pantes menghadep pada Baginda Radja, sebab pakean itoe ada berdeboe atawa koerang beresih, oleh kerna telah terpake bebrapa hari di perdjalanan; maka kaädaännja pakean itoe nenerbitken amarahnja toewan Brezé ijang ada djadi pengoeroes hal adat-lembaga: toewan ini tida maoe mengarti begimana orang brani dateng aken menghadep pada Baginda, dengen berpakean begitoe roepa. Sesoedahnja Hertog de Blancas membri taoe, bahoewa Villefort itoe misti lantes dateng menghadep oleh kerna adanja titah Baginda, baroelah toewan Brezé itoe membri idzin aken Villefort berdjalan masoek.
Baginda masih berdoedoek djoega di tempatnja tadi, setelah Villefort melihat padanja, Villefort ini poen lantes berdiri diam di dekat pintoe.
„Masoek! Toewan Villefort!“ kata Baginda: „masoek sadja!“
