— 166 —
bamoe ini.“
Itoe mantri politie lantes bersoekoer pada Villefort denge melirik padanja itoe dengen bermoeka manis, dan Villefort dapet taóe, bahoewa ija telah dapetken maksoednja hati, jaitoe mendapet soekoernja Baginda Radja dan dapet robahken moesoeh mendjadi satoe sobat, ijang brangkali djoega nanti boleh menoeloeng di dalem tempo kasoesahan.
„Baiklah,“ kata Baginda; kemoedian sambil menengok pada Hertog de Blancas dan Baron Dandré, ija berkata poela: „Sekarang ini angkaoe boleh berlaloe, Toewan-toewan! apa ijang misti dikerdjaken lagi, ada bagiannja kantoor paperangan.“
„Soekoer sekali, Toewan!“ kata Hertog de Blancas: „kita-orang boleh pertjaja pada balatantara. Toewankoe poen taoe, tjara begimana soerat-soerat rapport ada njataken kesatiännja balatantara pada tachta toewankoe.“
„Djanganlah kaoe bitjara lagi dari hal soerat-soerat rapport,“ sahoet Baginda: „soerat-soerat itoe poen tida boleh dipertjaja. Tapi Toewan Baron! apa kaoe belon dapet lagi kabar apa-apa dari hal itoe perkara di djalanan St. Jacques?“
Villefort merasa terkedjoet di dalem hati, tempo ija denger Baginda Radja menanja begitoe pada mantri politie.
„Toewankoe,“ sahoet mantri itoe: „tadi hamba telah, dateng di sini dengen niatan aken sembahken pada toewankoe kabar-kabaran ijang terdenger paling belakang atas hal itoe, tapi toewankoe, sedeng beringet pada perkara besar ijang terkabar ada terdjadi di sebelah oedik; sekarang kabar-kabar dari hal di djalanan St. Jacques itoe soedah djadi tida perloe disampeken pada toewankoe.“
