— 177 —
taoe djoega, bahoewa di boelan Januari tida ada orang mandi di kali Seine. Djanganlah koerang pertjaja; matinja Generaal itoe memang betoel sekali ada terdjadi lantaran pemboenoehan.“
— „Siapatah ada bilang begitoe?“
— „Baginda Radja sendiri!“
— „Baginda Radja! akoe telah kira ijang dia itoe ada berboedi besar, dan ada taoe bahoewa di dalem perkara negri tida ada hal pemboenoehan: orang tida boenoeh orang, hanja orang lakoeken sadja halangan ijang ada di djalanan. Kaoe maoe taoe, begimana adanja itoe perkara? Dengerlah! akoe nanti bilang itoe padamoe. Orang soedah. kira boleh dapet bantoeän dari itoe Generaal Quesnel, sebab dari poelo Elba orang ada kabarken kita begitoe; satoe dari antara orang-orang pakoempoelan kita pergi pada Generaal itoe dan minta ija dateng bersama-sama di soewatoe perhimpoenan di St-Jacques, di mana ija nanti bertemoe pada kita orang; betoel-betoel ija dateng di perhimpoenan itoe, dan orang lantes bri taoe padanja antero rasia, ja-itoelah bahoewa Baginda Keizer bakal dateng ka tanah Frankrijk; tapi tempo ija soedah denger segala perkara dan soedah dapet taoe segala hal, hingga tida ada apa-apa lagi ijang misti dikabarken padanja, ija lantes bri taoe, ijang ija bersetia pada Radja. Di sitoe kita-orang semoewa djadi kaget dan tertjengang; kita-orang lantes minta biar Generaal itoe bersoempah aken toetoep rasia kita, dan ija toeroet permintaän itoe, tapi dengen sanget tida senang, hingga semoewa orang djadi merasa gemas padanja; tapi maski begitoe kita orang biarken ija berlaloe dengen senang dan slamat. Kemoedian ada djadi katahoeän, ijang
