— 178 —
dia itoe tida poelang lagi ka roemahnja sendiri. Dia itoe soedah berlaloe dari antara kita dan brangkali djoega ija soedah kasalahan djalan dan djadi tertjeboer ka dalem kali. Satoe pemboenoehan! kaoe membri heran padakoe, anak! oleh kerna satoe Wakil-Procureur Baginda Radja maoe menoedochken kesalahan pada orang, dengen tida ada ampoenja kanjataän ijang salah. Kaloe kaoe lakoeken djabatanmoe dan soeroeh algodjo koentoengken kapalanja seorang kambratkoe, apa akoe nanti berkata: „Anak! kaoe berboewat pemboenoehan!“ —tida sekali! hanja akoe berkata: „Baik, Toewan! kaoe soedah berperang dengen gagah; tapi di hari besok ada giliran kita!
Villefort berdiam sekoetika, lamanja laloe berkata: „Tapi ajahkoe, kaloe giliran dateng pada kita, tentoe sekali giliran tjilaka besar.”
„Akoe tida mengarti, apa ijang kaoe hendak bilang,” kata Noirtier.
— „Kaoe mengharep-harep datengnja Napoleon, boekan?“
— „Ja.”
— „Pertjoemah sadja, ajahkoe! kerna belon sampe masoek ka tanah Frankrijk sepoeloeh mijl djaoehnja, Baginda itoe nanti diserang dan diboenoe orang seperti satoe binatang.”
— „Enak amat omonganmoe itoe! di ini waktoe Baginda Keizer telah ada di djalanan ka Grenoble; di tanggal 10 atawa 12 ija nanti sampe di Lyon, dan di tanggal 20 atawa 25 ija nanti ada di ini kota Parijs.”
— „Sekalian pendoedoek negri nanti bergerak.”
— „Ja, semoewa nanti bergerak aken samboet datengnja dengen girang hati.”
