— 179 —
— „IJa tjoema teriring oleh sedikit soldadoe, boekan? dan orang nanti serang padanja dengen balatentara besar.”
— „Ja, dengen balatentara besar sekali, ijang nanti bawa ija dengen bersoerak-soerak poelang pada tachtanja di ini kota Parijs. Soenggoeh, anakkoe! kaoe ini masih anak-anak dengen sebenernja! Kaoe kira, kaoe soedah taoe .resia besar, sebab kaoe soedah dapet kabar ijang berkata padamoe: Napoleon soedah dateng di Dannes dengen terïring oleh sedikit soldadoe; orang memboeroe padanja. Itoelah ijang kaoe taoe, lain tida. Ja, orang nanti memboeroe padanja sampe di kota Parijs, dengen tida sekali boenjiken senapan.”
— „Grenoble dan Lyon ada setia pada Baginda Radja, dan nanti menoetoep djalanannja Napoleon.”
— „Grenoble nanti boekaken pintoe-pintoenja, pada waktoe Napoleon sampe; sekalian pendoedoek kota Lyon nanti samboeti dengen girang datengnja Baginda Keizer. Pertjajalah padakoe, anak! orang-orang Bonapartisch tida bodo, dan ija-orang poenja mata-mata tida kalah sama kaoe poenja. Kaoe maoe keterangan? Dengerlah: kaoe tida maoe kasih akoe taoe, ijang kaoe ada dateng di sini, tapi toch akoe dapet taoe, pada setengah djam sesoedah kaoe dateng di ini kota; kaoe tida kasih taoe pada seorang lain dari koesirmoe, di mana kaoe hendak menoempang di ini kota, tapi toch akoe taoe kaoe ada di mana dan aken kenjataän hal itoe, akoe dateng padamoe, kaloe kaoe maoe berdoedoek makan, panggillah boedjang dan minta lagi barang makanan; kita orang nanti makan bersama-sama.”
