— 195 —
Villefort ada merasa koerang betah di Marseille, dari sebab keadaännja di itoe kota ada mengganggoe pada kesenangan hatinja; ija meminta dan dapetken djabatan Procureur-Radja di Toulouse. Ampatbelas hari sasoedahnja memangkoe djabatan itoe, ija menikah pada Nona René de Saint Méran, ijang bapanja ada bertambah-tambah ternama besar di dalem kraton Frankrijk.
Begitoelah adanja hal; maka di dalem tempo itoe saratoes hari, di mana Napoleon ada bertachta kadoewa kali, Edmond Dantes tinggal tertoetoep djoega, dan maskipoen ija tida kaloepaän oleh manoesia, tapi ada seperti kaloepaän oleh Allah.
Danglars poen mengarti, bagimana besar ija soedah meroegiken pada Dantes, tempo ija lihat Napoleon dateng kombali.
Tapi tempo Napoleon soedah bertachta di Parijs. Danglars itoe djadi merasa takoet, di dalem segala waktoe ija sangka nanti dapet melihat Dantes dateng sekoenjoeng-koenjoeng dan membales sakit hati padanja. Sebab begitoe, Danglars itoe lantas bri taoe pada toewan Morrel, ijang ija ingin keloewar dari pakerdjaän orang pelajaran, dan ija minta toeloengannja Toewan terseboet, soepaja ija dapet pakerdjaän di dalem satoe kantoor-dagang di Spanje. Dari sebab ija dapet kerdjaän itoe dengen toeloengannja Toewan Morrel, maka pada tempo Napoleon baroe dateng kombali sapoeloeh atawa doewa-belas hari di kota Parijs, Danglars itoe soedah berangkat ka kota Madrid, iboe-kota Spanje, dan orang tida denger apa-apa lagi dari halnja itoe.
Fernand tida taoe apa-apa, Dantes tida ada itoelah satoe perkara ijang senangken hatinja. Apa soedah djadi dengen
