— 196 —
Dantes itoe, ija tida tjari taoe; ija goenaken sadja segala akal aken djoestain Mercedes di dalem halnja Dantes itoe tertahan; Fernand itoe ada berniat djoega aken pergi ka lain negri dan membawa Mercedes itoe ka sana. Tempo-tempo adalah djoega Fernand itoe merasa koewatir di dalem hatinja, kaloe-kaloe Dantes nanti dateng kombali pada Mercedes, Djika mendapet rasa begitoe, lelaki itoe pergi berdoedoek di poentjak goenoeng Pharo, dari mana ija boleh melihat ka Marseille sambil melihat djoega pada desa Catalaan; di sitoe ija berdiam selakoe koetjing mengintip tikoes, dan ija memandang sadja pada djalanan, kaloe-kaloe nanti dapet lihat Dantes djalan di sitoe. Fernand itoe ada berniat aken menembak sadja pada Dantes, kaloe Dantes itoe dateng kombali; kemoedian ija nanti menembak pada dirinja sendiri. Tapi ini niatan ijang kadoewa, tentoelah djoega satoe perkara ijang tida bisa mendjadi: Fernand itoe tida nanti memboenoeh diri; sebab ija ada sanget mengharep nanti dapetken nona Mercedes.
Sedang begitoe, Keizer Napoleon ada meminta bantoeännja rahajat; maka segala orang ijang bisa angkat sendjata, berangkatlah ka medan peperangan.
Fernand djoega berangkat dengen hati sanget doeka dan sanget merasa koewatir, kaloe-kaloe sesoedahnja ija pergi, Edmond Dantes nanti dateng dan menikah pada Mercedes.
Kaloe Fernand memboenoeh diri, tentoelah ija berboewat itoe pada waktoenja maoe tinggalken nona katjintaännja.
Kalakoeännja ijang manis oleh Mercedes, dan kelakoeännja ijang njataken rasa kasihan oleh itoe nona, adalah terbitken djoega sedikit seminja katjintaän di dalem hatinja nona itoe: seorang ijang berhati toeloes
