— 333 —
Sedeng begitoe, ija merasa senang hati: lebih doeloe poen ija ada koewatir, kaloe-kaloe Dantes itoe ada satoe mata-mata dari pabejaan; sekarang koewatirnja itoe terhilang, oleh kerna melihat kapandeannja Dantes di dalem hal pelajaran dan denger omongannja Dantes, ijang menjataken ada kenal pada banjak tempat, sebegimana biasanja orang pelajaran. Dengen hal ijang demikian itoe, Kapal Amalia itoe sampe di Livorno.
Di kota Livorno itoe Dantes tjari taoe apa orang masih kenali padanja atawa tida. Ija ingat betoel, begimana adanja roepa sendiri ditempo moeda; sekarang ija hendak lihat begimana adanja roepa itoe, sesoedahnja melaloei ampat belas tahon. Soedah doewa poeloeh kali ija dateng di Livorno, dan ija kenal satoe toekang tjoekoer di sana ijang beroemah di djalanan Saint-Fernand; ija pergi pada ini toekang tjoekoer, aken minta ditjoekoeri djembros dan ramboet kapalanja.
Toekang tjoekoer itoe memandang dengan heran pada Dantes, ijang pake ramboet dan djembros begitoe pandjang: di masa itoe poen tida ada kabiasaan aken membiarken ramboet dan djembros sampe djadi pandjang begitoe.
Aken tetapi toekang tjoekoer itoe tida membilang satoe apa, hanja lantas sadja moelai tjoekoeri Dantes.
Setelah soedah seleseh ditjoekoeri ramboet dan djembros, Dantes lantas berkatja. Seperti telah terseboet, sekarang ini ija beroemoer tiga poeloeh tiga tahon; itoe kasangsaraan ampat belas tahon lamanja ada terbitken perobahan banjak pada roepanja Dantes itoe. Ija poenja moeka ijang boender, sekarang ini djadi londjong, ajer moekanja ijang manis, sekarang ini djadi sada-sada asam, sedang matanja ijang bersorot haloes, sekarang ini djadi sada-sada beringas, dan koelit
