— 335 —
waktoe soedah gelap, dan oleh kerna ada pertandaan dari kapal ijaitoe lantera ijang digantoengken pada tempat bendera maka pada waktoe malem datenglah ampat praoe mengamperi dari palaboehan kapada kapal Amalia, aken trima dan bawa ka darat barang-barang moewatannja kapal itoe.
Pada waktoe poekoel doewa di waktoe malem, samoewa barang soedah habis ditoeroenken dari kapal dan dinaikken ka darat. Di itoe malem djoega Kapitein kapal Amalia itoe lantas membagiken oewang kaoentoengannja pada matroos-matroos, sebagimana ijang telah ditentoeken djadi bagiannja marika ini.
Dari sitoe kapal Amalia itoe berlajar ke Sardine, aken mengambil di sitoe barang-barang moewatan ijang misti dibawa ke Lucca, dan sigralah djoega ija sampe ka sana dan menerima banjak barang, di antara mana ada paling banjak roko Havanna dan anggoer Malaga.
Tapi setelah sampe di Lucca, orang-orang kapal Amalia djadi bakalahi sama orang-orang pabejaan. Saorang pabejaan djadi roeboeh. Dantes dan satoe matroos lain mendapat loeka lantaran kalanggar pelor.
Maskipoen dapet loeka Dantes ada merasa aoe di hati, oleh kerna dapat lihat roepanja itoe orang pabejaaan ijang dapat loeka pajah dan roeboeh.
Pada tempo Dantes djato, oleh kerna dapat loeka, Jacopo sigra mengamperi dan menoeloengi padanja. Jacopo itoe soedah sangka, Edmond pantes terboenoeh, tapi Edmond tjoemah dapat loeka di bahoe tangannja ijang kiri.
Jacopo merawati pada Dantes, seperti pada soedara sendiri, dan sigralah djoega Dantes itoe djadi semboeh dari
