— 338 —
besar.
Kapitein kapal Amalia bri taoe perasaannja bahoewa hal serahken barang-barang itoe pada lain kapal baiklah dibikin di tepi poelo Monte-Christo, satoe poelo ijang tida ada poenja pendoedoek, tida ada poenja pabejaan.
Setelah denger namanja poelo itoe, Dantes djadi bergoemetar oleh kerna merasa amat girang; maka ija lantas ber-bangkit dan berdjalan-djalan boelak-balik, soepaja tida nanti ketara, ijang hatinja ada tergontjang keras.
Tempo ija dateng kombali ka dekat madjikannja, perkara ijang diperdamiken itoe, soedah ditetepken. Kapal Amalia nanti antarken itoe barang-barang ka poelo Monte-Christo, dan nanti berangkat ka sana besok malem. Tempo Edmond Dantes ditanja begimana pikirannja atas hal itoe, lantas sadja ija berkata, bahoewa poelo Monte-Christo, itoe ada amat soenji dan baik sekali aken orang bekerdja di dalem gelap.
Maka tidalah ada sangkoetan satoe apa aken lakoeken itoe pelajaran ka Monte-Christo. Waktoe aken berangkat poen tida dirobah lagi, dan dari sebab kapal Amalia itoe nanti berangkat pada besok malem, maka kaloe tida ada sangkoetan di pelajaran, pada noesa malem ija nanti sampe ka tepi Monte-Christo.
