— 343 —
bitken doegaän apa-apa di hatinja orang itoe.
Aken tetapi, setelah soedah djalan djaoeh sedikit, Dantes dapet tembak dan boenoeh satoe kambing; di sitoe ija lantas soeroeh Jacopo pergi bawa kambing itoe pada teman-temannja, dengen meminta djoega, soepaja teman-temannja nanti panggang dagingnja hewan itoe. Dan nanti boenjiken senapan, kaloe makanan soedah sedia, soepaja ija (Dantes) boleh dateng dan makan bagiannja.
Sesoedah Jacopo djalan berlaloe, Dantes teroesken perdjalanannja, dan tempo sampe poentjaknja soewatoe boekit karang, ija dapet lihat teman-temannja ijang lagi sediaken barang makanan dan ada berkoempoel di pinggir laoet.
Dengen tersenjoem Dantes memandang sekoetika lamanja pada marika itoe.
„Di dalem tempo doewa djam lagi,” kata Dantes sendiri-diri: „sekalian orang ini nanti berangkat pergi, masing-masing dengen membawa oewang bagiannja. Berangkat pergi ka-mana? Pergi lakoeken lain pelajaran aken dapetken lagi sedikit oewang bagian; tapi kaloe soedah ada poenja banjak oewang, ija-orang sia-siaken itoe dengen bersoeka-soekaän di kota ini atawa itoe.—Ja, di ini hari, dari sebab akoe ada poenja harepan besar, akoe tertawain kantong-doewitnja marika ini; tapi di hari besok, kaloe akoe tida dapet itoe harta besar, brangkali djoega akoe nanti kapingin ada ampoenja kantong-doewit, ijang berisi seperti kantong poenjanja itoe.—Tapi ach! masalah nanti djadi begitoe! Itoe Faria ijang berboedi, tida nanti maoe harepi itoe harta, kaloe ija tida taoe dengen tentoe, ijang harta itoe misti ada dengen sesoenggoehnja.—Lain dari begitoe, akoe lebih soeka mati, dari pada misti hidoep selamanja
